उद्योग वाणिज्य संघ, जाजरकोटमा एमाले–राप्रपा गठबन्धन विजयी

जाजरकोट

२३ असोज २०७४  ।

जाजरकोट उद्योग वाणिज्य संघको आइतबार सम्पन्न निर्वाचन परिणामअनुसार अध्यक्षमा एमाले र राप्रपाका साझा उम्मेदवार कर्णबहादुर खत्रीसहित गठबन्धनको प्यानलै विजयी भएको छ ।

खत्रीले कांग्रेस र माओवादी (केन्द्र) का साझा उम्मेदवार भद्रबहादुर वलीलाई ८३ मत अन्तरले पछि पार्दै विजयी बनेका हुन् । खत्रीको पक्षमा ३६७ मत परेको थियो भने वलीले २८४ मत प्राप्त गरे ।

वरिष्ठ उपाध्यक्षमा पनि कर्णकै प्यानलका शिवविक्रम हमाल विजयी भएका छन् ।

त्यस्तै उपाध्यक्षको परिणाम नरबहादुर थापाको पक्षमा परेको छ । महासचिवमा ईश्वरीबहादुर खत्री, सचिवमा अमरबहादुर शाही र कोषाध्यक्षमा मोहन खड्का चुनिएका छन् ।

त्यसैगरी खुल्ला सदस्यमा चक्रबहादुर थापा , मंगले बुढाथोकी , खिमबहादुर शाही र विष्णु वली विजयी भएका छन् ।

जनजाति सदस्यमा गणेशबहादुर थापा , महिला सदस्यमा बन्दना पुन , धनमाया खड्का र दलित सदस्यमा गणेशबहादुर कामी विजयी भएको उद्योग वाणिज्य संघ जाजरकोटले जनाएको छ ।

अपांग सदस्यमा यसअघिनै काँग्रेस–माओवादी केन्द्र गठबन्धनका भीमबहादुर खत्री निर्विरोध निर्वाचित भइसकेका छन् ।