हुम्लाको सर्केगाडको उपाध्यक्षमा माओवादीबाट देवकी तिमिल्सिना उम्मेदवार
सुर्खेत ।
नेकपा (माओवादी केन्द्र) ले रिक्त रहेको हुम्लाको सर्केगाड गाउँपालिकाको उपाध्यक्षमा देवकी तिमिल्सिनालाई उम्मेदवार बनाएको छ ।
माओवादीका नेता कार्यकर्ता तथा मतदाता नाराजुलुससहित उम्मेदवारी दर्ता स्थल पुगेका थिए ।
जनयुद्धकी जनकलाकार तथा संचारकर्मी देवकी संवाद डबलीकी उपाध्यक्ष समेत हुन् ।
यसअघि भएको स्थानीय तहको निर्वाचनमा सर्केगाडको उपाध्यक्षमा माओवादी केन्द्रबाट निर्वाचित चन्द्रसिंह कार्की ‘मुक्ति’ को दुर्घटनामा परी निधन भएको थियो । सुर्खेतमा भएको दुर्घटनामा मुक्तिको निधन भएसँगै सर्केगाडको उपाध्यक्षको लागि उपचुनाव हुन लागेको हो ।
माओवादी जनयुद्धदेखि पत्रकारिता समेत गर्ने तिमिल्सिना पछिल्लो समयमा साहित्य लेखनमा समेत निरन्तर लागिरहेकी छन् । उनका योद्धाको सपना लगायतका कृतिहरु बजारमा चर्चित छन् । नोपाली साहित्यको विकास र विस्तारमा योगदान पु¥याउँदै आइरहेकी तिमिल्सिना परिवर्तनको पक्षधर भएकाले पनि युवाहरुका बीचमा लोकप्रिय मानिन्छन् ।
