शहिदको सम्झनामा अस्पताललाई सामग्री हस्तान्तर

सुर्खेत

२१ श्रावण
सुर्खेतमा रहेको मध्यपश्चिमाञ्चल क्षेत्रीय अस्पताललाई विभिन्न सामग्रीहरु हस्तान्तरण गरिएको छ । कर्णाली प्रदेश स्थापनाका लागि भएको आन्दोलनमा शहादत प्राप्त गरेका ४ जना शहिदहरुको सम्झनामा याम बिसी स्मृति प्रतिष्ठानले अस्पताललाई सामग्रीहरु हस्तान्तरण गरेको हो । १२ थान बेडसिट (तन्दा) र २ वटा बाल्टिन याम बिसी स्मृति प्रतिष्ठानका अध्यक्ष एवम् शहिद याम बहादुर बिसीका पिता शेरबहादुर बुढाले हस्तान्तरण गर्नुभएको हो । क्षेत्रीय अस्पतालका प्रमुख मेडिकल सुपरिटेण्डेण्ट डा. डम्बर खड्कालाई उहाँले सामग्रीहरु हस्तान्तरण गर्नुभएको थियो ।

सामग्री हस्तान्तरण कार्यक्रममा बोल्दै अस्पताल प्रमुख मेसु डा. खड्काले आन्दोलनको समयमा भएको क्षति प्रति दुःख व्यक्त गर्नु भयो । राजनीतिक श्रेय लिन खोज्नेहरुका कारण उक्त आन्दोलनमा सर्वसाधारणले ज्यान गुमाउनु परेकोमा आफू दुःखी भएको बताउँदै शहिदहरुको आत्माको चीरशान्तिको कामना समेत गर्नुभएको थियो । शोकलाई शक्तिका रुपमा परिणत गर्दै शहिद परिवारले अस्पतालप्रति गरेको सहयोगले ठूलो सहयोग मिलेको डा. खड्काको भनाई थियो । याम बिसी स्मृति प्रतिष्ठानले गरेको सहयोग बराबर नै आफूले पनि व्यक्तगत रुपमा अस्पताललाई प्रदान गर्ने प्रतिवद्धता समेत गर्नुभएका डा. खड्काले कर्णालीको राजधानी सुर्खेतमा रहेको अस्पताललाई सबैको साथ र सहयोगले अझैँ परिस्कृत गर्दै लैजान सकिने बताउनु भयो । अस्पताल प्रतिको विश्वासका कारण पनि अस्पतालले धेरै विरामीहरुको सेवा गर्न पाएकोमा मलाई खुसी लागेको छ डा. खड्काको भनाई थियो ।

यही श्रावण १९ गतेदेखि २५ गतेसम्म शहिदहरुको सम्झनामा आयोजना गरिएको सप्ताहव्यापी कार्यक्रमहरु गरिरहेको छ । तत्कालिन आन्दोलनमा सुर्खेतका यामबहादुर बिसी, टीकाराम गौतम, गोपालसिं रजवार र जुम्लाका हरिबहादुर कुँवरले शहादत प्राप्त गरेका थिए ।