कविता “नयाँ युग ” -प्रताप पौडेल
युगको प्रवाहसँगै
समयको गतिसँगै
यात्रा गरिरहेछ शोषणले ।
आजको युगमा पनि
वर्गरहित समाज निर्माणार्थ
संघर्षरुपि तस्बिरहरु रंगिदैछन ।
त्यही तस्वीरहरुको लडाइबाट
आउने सुन्दर बिहानी !
पक्कै पनि एकदिन
मन्थन हुनेछ सत्यको,
गन्थन हुनेछ न्याय र समानताको
उहिलेको आदिम साम्यवादी युग
स्थापनाका स्वरहरु गडगडाइरहेकाछन
नयाँ ढंगले !
चुसिखान पल्केका विरुद्ध
उठदैछन चुसिएका जनहरु ।
गरिबको रगत र पसिनाको
समुन्द्रमा जहाज सवार सामन्तहरु हो
जब फल्नेछन
वर्गसंघर्षका बिजहरु
तब बिस्फोट हुनेछन तिम्रा साम्राज्यहरु ।
क्रान्तिको खातिर!
सतिसाल बनेर उभिनेछन
थिचिने र मिचिनेका स्वरहरु
शोषित वर्गका बिचारहरु ।
हुनेछ बर्गयुद्द,
चल्नेछ लडाइ शोषकका बिरुद्ध
संघर्ष-संघर्षको मैदानबाट
आउनेछ नयाँ युग !
त्यो युग हुनेछ समाजवादको,
उदाउँदो साम्यवादको
अन्धाकाररुपी बादल चिरेर
फेरि पनि उदाउनेछन
नयाँ चन्द्र र सुर्य,
चम्किलो बिहानी ।
