दिक्क छन् अभिशप्त मालाहरु
न जन्म दिनको शुभकामना
न मृत्युको समवेदना
संवेदनाहीन बुख्याचाहरुको गलामा
चाकडीबाजहरुका स्वार्थी डुँडुल्नाहरुबाटउचालिएर
खातका खात थुप्रिएर
फोटो शेसनकालागि पोज दिनु पर्दा
खुम्चिएर लाजले
मुर्झाएका छन् विचरा फुलहरु
बेशरम हाँसिरहेका
सर्कसका जोकरका जस्ता नक्कली अनुहार, र
साउनका जुकाहरुझैं सगबगाइरहेका
सिकसिक लाग्दा आसेपासेहरुको ठेलमठेल देखेर
किंकर्तव्यविमूढ छ विचरोमालामा उनिएको धागो
न जन्म दिनको शुभकामना
न मृत्युको समवेदना
शरमहीनहरुको गलामा थुप्रिएर
फोटो शेसनकालागि पोज दिनु पर्दा
दिक्क छन् अभिशप्त मालाहरु
***
काठमाण्डौं,३० जेठ २०७८
