व्यावसाय दर्ता गर्न ३५ दिनको समय

जुम्ला ।
जिल्लाको हिमा गाउँपालिका वडा नं. १ ले वडा भित्र व्यापार व्यावसाय गर्नेहरुलाई आधिकारिक रुपमा व्यावसाय दर्ता गर्न ३५ दिनको समय दिने भएको छ ।

वडा अध्यक्ष रतनबहादुर शाहीको अध्यक्षतामा बसेको बैठकले वडाभित्र व्यावार व्यावसाय गरेकाहरुले स्थायी लेखा नम्बर (प्यान) लिनका लागि ३५ दिनको समय दिने निर्णय गरेको वडा सचिव मृगेन्द्र हमालले जानकारी दिए । तोकिएको समयमा कार्य नगर्नेहरुलाई उद्योग वाणिज्य संघ जुम्ला र जिल्ला प्रशासन कार्यालय जुम्लाको सहयोगमा आवश्यक कारवाहीका लागि सिफारिस गर्ने समेत बैठकले निर्णय गरेको छ ।

यसका साथै वडा भित्र संचालन भइरहेका पसलहरुमा अनुगमन समेत गरिएको छ । दैनिक उपभोग्य बस्तुहरुको म्याद समाप्त हुने मिति तथा अन्य आवश्यक विषयमा स्वास्थ्य चौकी बड्की, प्रहरी चौकी बड्कीका प्रतिनिधि र वडा कार्यालयको संयुक्त टिमले बजार अनुगमन गरेको थियो । अनुगमनको क्रममा उपभोग्य मिति सकिएका केही बस्तुहरु फेला परेकाले त्यस्ता वस्तुको नष्ट गर्ने वा सम्बन्धित डिलरलाई फिर्ता गराउने बारे व्यावसायीलाई सचेत गराइएको वडाअध्यक्ष रतनबहादुर शाहीले बताए ।

अनुगमनमा वडाका सबै जनप्रतिनिधि र स्वास्थ्य चौकी तथा प्रहरी चौकी बड्कीका इन्चार्ज समेत सहभागी थिए ।