संविधानको रक्षा गर्नु हाम्रो जिम्मेवारी र कर्तव्य दुबै हो : गिरी
- 1.9Kshares
- Viber
- Facebook Messenger
सुर्खेती राजनीतिको क्षेत्रमा २०३३ सालदेखि होमिएर २०३७ सालमा जिल्ला पञ्चायत सुर्खेतको मनोनीत सदस्य भइसकेपछि सुर्खेती जनताका बिचमा कुशल राजनीतिज्ञको छवि बनाउन सफल एउटा सुर्खेती नेताको नाम हो तुलाराम गिरी । २०३३ सालमा वीरेन्द्रनगर नगरपञ्चायतको उप प्रधानपञ्च भएदेखि लोकप्रियता कमाउन सफल हुनुभएको तुलाराम गिरी सुर्खेती जनताका बिचमा कुनै नौलो नाम पनि होइन । २०६३ सालमा जिल्ला विकास समिति सुर्खेतको उप सभापति समेतको जिम्मेवारी सम्हालेर सुर्खेती जनताबिचमा विकासप्रेमी नेताको रुपमा आफूलाई स्थापित गराउन समेत सफल हुनुभएका सुर्खेतका पुराना शिक्षकको रुपमा समेत चिनिनुहुन्छ तुलाराम गिरी । अहिले राष्ट्रिय प्रजातन्त्र पार्टीको केन्द्रिय सदस्य समेत रहनुभएका तुलाराम गिरीले आसन्न प्रतिनिधि सभा र प्रदेश सभाको निर्वाचनमा सुर्खेत क्षेत्र नं. २ (क) बाट प्रदेश सभा सदस्यका लागि राष्ट्रिय प्रजातन्त्र पार्टीको तर्फबाट उम्मेदवारी दर्ता गराउनु भएको छ । समसामयिक राजनीतिक विषयमा रहेर क्वीक खबर डटकमका लागि उहाँसँग गरिएको भलाकुसारी :
१. तपाई आफूलाई कसरी चिनाउन चाहनुहुन्छ ?
शिक्षण पेशा छोडि २०३३ सालमा वीरेन्द्रनगर नगरपञ्चायतको उपप्रधानपञ्चमा रही २०३७ सालसम्म जनताको सेवा गरे । २०३७ सालमा जिल्ला पञ्चायत सुर्खेतको सदस्य पदमा मनोनीत भइ सेवा गर्ने अवसर प्राप्त भएको एउटा जनताको सेवकको रुपमा आफूलाई चिनाउन चाहन्छु । केही पाउनका लागि नभई जनताको सेवा गर्नका लागि राजनीतिमा लागेको मात्र होइन विभिन्न सामाजिक क्षेत्रमा समेत काम गरेकोले मैले दावाका साथ आफूलाई समाजसेवी भन्न रुचाउँछु ।
२. तपाई अहिले प्रदेश सभाको सदस्यमा उम्मेदवार बन्नु भएको छ ? कस्तो छ अवस्था ?
देशमा अहिले वाम गठबन्धन भएकोले जनताका विचमा एउटा हावा फैलिएको छ । देश अब वामहरुको हातमा जान्छ भन्ने । तर जनताका विचमा जुन हल्ला फैलाइएको छ । त्यस्तो पटक्कै छैन । किनकी राजनीतिक क्षेत्र भनेको कतिपय हल्लाका भरमा अगाडि बढ्ने तर अन्तमा हात्ति आयो हात्ति आयो फुस्सा भने जस्तै हुन्छ । यो वाम गठबन्धन पनि त्यही हो । देशको सीमा रेखादेखि, राजा सहितको प्रजातन्त्र, सनातन धर्म र सम्वद्र्धनवाद जस्ता मूल एजेण्डा स्थापित गर्न र त्यसको रक्षाका लागि राष्ट्रिय प्रजातन्त्र पार्टीको जुन एजेण्डा छ त्यो एजेण्डामा टेकेर हामी अघि बढिरहेका छौ । त्यसको आधारमा मैले आफ्नो उम्मेदवारी दिएको हुँ । यो मेरो व्यक्तिगत भन्दा पनि सुर्खेती जनताको इच्छाले गर्दा म जनताको सेवकको रुपमा अगाडि बढ्न चाहेको कुरा सबैलाई अवगत गराउन चाहन्छु ।
३. तपाईहरुको पनि लोकतान्त्रिक गठबन्धन भएको छ नि ? तर सुर्खेतमा त सबैको उम्मेदवारी परेको छ किन ?
अप्रत्यासित रुपमा वाम गठबन्धन भयो । प्रजातान्त्रिक गठबन्धनको जन्म गराउन वाम गठबन्धनले ठूलो भूमिका खेल्यो । किनकी वामहरु एक भएर देशमा साम्यवाद स्थापना गर्छौ भन्दै हिडेको बेलामा प्रजातन्त्रको मूल्य र मान्यतामा स्थापना भएको संविधानको रक्षा गर्नु हाम्रो जिम्मेवारी र कर्तव्य दुबै भएकोले हामीले पनि गठबन्धन गर्नु परेको हो । तर सुर्खेतको हकमा नेपाली काँग्रेसका साथीहरुले जुन दम्भका साथ अगाडि बढ्ने खालको योजना बनाउनु भयो । त्यसरी गठबन्धनको वेवास्ता गर्दै उहाँहरु अगाडि बढेपछि हामी पनि आफ्नो पार्टीको एजेण्डालाई लिएर अगाडि बढ्न बाध्य भयौ । त्यसैले सुर्खेतमा प्रजातान्त्रिक गठबन्धनमा रहेकाहरुले पनि उम्मेदवारी दिनु परेको हो । राजनीतिक रुपमा आफ्नो सिद्धान्त र एजेण्डामा कोही ठूलो र सानो हुँदैन त्यसैले हामीलाई कसैले आकारमा सानो नदेखेपनि हुन्छ । तपाईको यो मिडिया मार्फत भन्न चाहन्छु मन्दिरमा भक्तजनहरु कति संख्यामा हुन्छन् तर घण्टी बजाउने एउटै पूजारी नै सबैको केन्द्रमा रहन्छ । त्यसैले हाम्रो संगठन र हाम्रा कार्यकर्ताहरु मन्दिरको पूजारी झै पवित्र छन् । काँग्रेसका साथीहरुले केन्द्रमा भएका सम्झौता बमोजिम सुर्खेतमा काम गर्न सक्नु भएन । हामीले लचकता अपनाउँदै गर्दा त्यसको फाइदा लिने कोसिस गर्नुभएको छ । तर त्यसरी कदापी हामी कुनै पनि व्यक्ति वा पार्टीको फाइदाको लागि झुक्नेवाला छैनौ देशैभर हामीलाई दिने भनिएका स्थानमा काँग्रेसले आफ्नो वाचा पूरा गर्छ भन्नेमा हामी ढुक्क थियौ । त्यसैले पहिलो चरणको मनोनयन दर्तामा हामीले त्यसलाई अक्षरस पालना गरेपनि दोस्रो चरणमा आइपुग्दा काँग्रेसले त्यसको पालना गर्न नखोजेकोले हामी बाध्य भएर दोस्रो चरणमा सबै क्षेत्रहरुमा उम्मेदवारी दिन बाध्य भएका हौ । जसले गर्दा लोकतान्त्रिक गठबन्धनको आशा र भरोसा गर्ने सबै जनतालाई समेत काँग्रेसको यो क्रियाकलापले दुःखी तुल्याएको छ ।
। हामी देशको र मातृभूमिको फाइदाका लागि झुक्न पनि जानेका छौ । त्यसकारण मेरो उम्मेदवारी हो । मलाई विश्वास छ सुर्खेती जनताले २०३३ सालदेखि मैले जनताका लागि गरेको सेवाको आंकलन गर्नुभएको छ । त्यो आंकलनलाई व्यवहारमा उतार्ने बेला आएको छ । व्यवहारमा उतार्न सुर्खेती विद्वान, स्वच्छ र निश्पक्ष भाव र मन भएका जनताहरु आतुर छन् भने उहाँहरुले दिने जिम्मेवारी सम्हाल्नको लागि म पनि हतारिएको छु ।
४. वाम गठबन्धन भएको बेलामा राष्ट्रिय प्रजातन्त्र पार्टीले चिर्वाचनको परिणाम आफ्नो पोल्टामा पर्ने आधारहरु के के हुन ?
निर्वाचनमा भाग लिनु र पार्टीको अस्तित्वलाई रक्षा गर्नु सबै पार्टीका नेता कार्यकर्ताहरुको दायित्व हो । त्यो दायित्वबाट राष्ट्रिय प्रजातन्त्र पार्टी पनि अछुतो रहनै सक्दैन । निर्वाचनमा गइसकेपछि एक भोटले भएपनि हारजित हुनु स्वाभाविक हुन्छ । यो मुल्य र मान्यतालाई हामी स्वीकार्छौ । तर तपाईले जुन पोल्टाको कुरा गर्नु भएको छ राष्ट्रिय प्रजातन्त्र पार्टीको पक्षमा जुन भोट आउँछ त्यो हाम्रै पोल्टाको भोट हो । ती सचेत जनताले हामीलाई दिएको भोटले नै हामी विजयी पनि हुन्छौ भने कथांकदाचित विजयी हुन नसकेमा पनि आफ्नो भोटको सम्मान गर्ने क्षमता भएका व्यक्तिहरु राष्ट्रिय प्रजातन्त्र पार्टीमा आवद्ध छौ । तर यहाँ गम्भिर कुरा के हो भने जुन वैचारिक ध्रुबीकरणको कुरा आएको छ । प्रजातान्त्रिक गठबन्धन नै पराजित हुने अवस्था आयो भने देशको भविष्य कहाँ पुग्ला भन्ने चिन्ता गर्ने बेला आएको छ । त्यसैले हामी प्रजातान्त्रिक गठबन्धनमा एक भएर लाग्ने योजना बनाएका हौँ तर सुर्खेतको हकमा साथीहरुले त्यसलाई अनुशरण गर्न सक्नु भएन । अझै पनि गठबन्धनको जीतलाई सुनिश्चित गर्ने हो भने बेलैमा गठबन्धन हुँदाका बखतमा केन्द्रमा शीर्ष नेताहरुको विचमा भएका सम्झौताहरुलाई अक्षरस पालना गर्न जरुरी छ । अनि मात्र सुर्खेतमा प्रजातान्त्रिक गठबन्धनले नै तपाई भने झैँ परिणाम आफ्नो पोल्टामा पार्ने कुरामा ढुक्क हुन सकिन्छ ।
४. यदि काँग्रेसले छोडेन भने राष्ट्रिय प्रजातन्त्र पार्टी के गर्छ होला ?
हामी पार्टीको निर्णयलाई शीरोधार्य गरेर लाग्ने पार्टीका कार्यकर्ता हौँ । गठबन्धन हुने बेलामा भएका वाचाहरु पूरा गर्नका लागि दुबै पक्ष तत्पर रहनु पर्छ । यदि त्यसो भएन भने गठबन्धनको औचित्य सुर्खेतमा मात्र होइन देशभरी समाप्त हुनसक्छ । त्यसले केही स्थानमा काँग्रेसलाई केही स्थानमा हामीलाई पनि घाटा त होला नै । तर त्यसलाई गौण पक्षको रुपमा राखेर पार्टीको केन्द्रिय समितिले हामीलाई जुन निर्देशन दिन्छ हामी त्यो पालना गर्छौ ।
५.अन्तमा केही भन्नु छ कि ?
प्रजातन्त्रिक पद्धतिमा जनता भनेकै न्यायधिस हुन । त्यसैले जनता जहिले पनि सत्यको पक्षमा हुन्छन् । सत्य केही दिन ओझेलमा पर्न सक्छ तर कदापी त्यो नष्ट भएर जाँदैन । नेपाली जनता सत्यकै पक्षमा उभिने भएकाले हामीले निर्वाचन जित्ने कुरामा विश्वास लिएका छौ । देश र जनताको हक र हितका लागि गरिएका गठबन्धनलाई तोडमोड र दम्भ देखाएर अहम्ताका साथ अगाडि जान खोजेमा दुबै हात रित्तो हुन सक्छ भन्ने कुरा राम्रोसँग सबैले बुझ्नु जरुरी छ । सुर्खेती आमा बुबा दाजुभाइ दिदीबहिनीहरुलाई विनम्रताका साथ भन्न चाहन्छु अहिले संविधान कार्यान्वयन गर्ने र ९४ प्रतिशत ओमकारहरुको रक्षा गर्ने बेला आएकोले अब आफ्नो धर्मको रक्षा गर्नका लागि पनि तपाईहरुको भोट राष्ट्रियता, प्रजातन्त्र र उदारवादको सिद्धान्तका पक्षमा हुनेछ भन्ने विश्वासका साथ यी शब्दहरुलाई सम्पूर्ण पाठकहरुसम्म पु¥याउन सहयोग गर्ने तपाईको मिडियालाई पनि धन्यवाद ।
- Total: 1.9K
- Viber
- Facebook Messenger