समय सान्दर्भिक साहित्य नै दीर्घजिवी हुन्छः कूलपति उप्रेती

काठमाडौं ।
नेपाल प्रज्ञा प्रतिष्ठानका कूलपति गंगाप्रसाद उप्रेतीले समय सान्दर्भिक साहित्य नै दीर्घजिवी हुने बताउनु भएको छ । विश्व नेपाली साहित्य महासंघ विश्व केन्द्रीय समितिको आयोजना तथा नेपाल शाखाको सहआयोजनामा नेपाल प्रज्ञा प्रतिष्ठानको लेखनाथ कक्षमा मंगलबार (कार्तिक ५ गते) भएको “काव्य विमर्श तथा कवि गोष्ठी“ कार्यक्रममा उहाँले यस्तो बताउनु भएको हो ।

उहाँले भन्नुभयो, नेपाल बाहिर रहेर पनि नेपाली भाषा र साहित्यको क्षेत्रमा काम गरिरहेका साहित्यकारहरुले नेपाली साहित्यको सामथ्र्यलाई विश्वभर चिनाएका छन् । उनीहरुसँगको साझेदारीलाई प्रज्ञा प्रतिष्ठान जहिले पनि स्वागत गर्दछ ।

नेपाली भाषा र साहित्यको सेतुको रुपमा विश्व नेपाली साहित्य महासंघले काम गरिरहेको बताउँदै कूलपतिले भन्नुभयो, साहित्यका क्षेत्रमा यस संस्थाले आफ्नो पहिचानन निर्माण गरेकामा खुसी लागेको छ ।

कार्यक्रममा नेपाल प्रज्ञा प्रतिष्ठानका सदस्य सचिव प्रा. जगतप्रसाद उपाध्यायले भन्नुभयो, नेपाली भाषा, साहित्य, संस्कृति र सभ्यतालाई विश्वव्यापी गराउन विश्व नेपाली साहित्य महासंघले योगदान दिएको छ । नेपाल बाहिर रहेका साहित्यकारहरुले अनुवादका माध्यमबाट अन्य भाषाका साहित्यसँग सम्बन्ध विस्तार गर्दै नेपाली साहित्यलाई सबै माझ पु¥याउन जरुरी छ ।

काव्य विमर्श तथा कवि गोष्ठीमा बोल्दै प्रा. डा. गोविन्दराज भट्टराईले भन्नुभयो नेपाल बाहिर रहेको नेपाली साहित्य बिना नेपाल भित्र रहेको नेपाली साहित्य अधुरो हुन्छ । साहित्यको जग भनेको अनुवाद नै भएकोले नेपाली साहित्यलाई अनुवाद गरेर विश्वभर फैलाउन जोड दिनु पर्ने उहाँको भनाई थियो ।

यसै गरि प्रा.डा. हेमनाथ पौडेलले विदेशमा बसेर महत्वपूर्ण काम गरिरहेका साहित्यकारहरुलाई साथ र सहयोग दिन प्रज्ञा प्रतिष्ठान तयार छ । पछिल्लो समयमा साहित्यमा फेरि एकपटक कविता लेख्नेहरुको बृद्धि भएको प्रसंगलाई इंगित गर्दै उहाँले भन्नुभयो स्तरीय कविता लेख्न सकेको खण्डमा मात्र साहित्य समाजको दर्पण मात्र होइन रुपान्तरण हुन सक्छ ।

विश्व नेपाली साहित्य महासंघले प्रदान गर्दै आएको साहित्यदूत कञ्चनजंगाबाट सम्मानीत हुनु भएको प्रा.डा. टंकप्रसाद न्यौपानेले मान्छे जहाँ गएपनि भाषा र साहित्य त्यही जाने भएकोले विश्वमा छरिएर रहेका साहित्यकारहरुलाई एकजुट बनाएर साहित्यको उन्नति गर्नै कार्यले आफूलाई खुसी लागेको बताउनु भयो । कार्यक्रममा महासंघका साहित्य संचार संयोजक रमेश कँडेलले स्वागत मन्तव्य र सल्लाहकार सागर श्रेष्ठले धन्यवाद मन्तव्य राखेका थिए । कार्यक्रममा महासंघको प्रकाशन “साहित्य संसार“ पुस्तक विमोचन गरिएको थियो । त्यसपछि प्रा डा टङ्कप्रसाद न्यौपाने, मनप्रसाद सुब्बा र भीम विरही राईलाई साहित्यदूत सम्मान अर्पण गरिएको थियो ।

विश्व नेपाली साहित्य महासंघ विश्व केन्द्रीय समितिका अध्यक्ष सुरेन्द्र लिम्बू परदेशीको सभापतित्वमा सम्पन्न उक्त कार्यक्रममा एक दर्जन कविताहरु वचन गरिएका थिए । कविता वाचन गर्नेहरूमा सीता तुम्खेवा, रमी श्रेष्ठ, समाश्री रावत, प्रगति राई, सीता भटराई, उर्मिला पाण्डेय, प्राज्ञ सभा सदस्य नन्दु उप्रेती, एलाक अभियान्ता डम्बर पहाडी, भावना न्यौपानेलगायतले कविता वाचन गर्नुभएको थियो ।

अन्त्यमा आगामी वर्ष नेपाल प्रज्ञाप्रतिष्ठानमा भब्य रुपमा साहित्यिक विश्व सम्मेलन गर्ने तयारी चलिरहेको कुरा जानकारी गराउँदै प्रज्ञाप्रतिष्ठानबाट आवश्यक साथ र सहयोगको अपेक्षासहित सभापति सुरेन्द्र लिम्बू परदेशीले कार्यक्रमको समापन गर्नु भएको थियो भने कार्यक्रम महासंघ विश्व केन्द्रीय समितिका अर्थसचिव खगेन्द्र अधिकारी अमृतले सन्चालन गर्नुभएको थियो ।