थप ६२९ जनामा कोरोना संक्रमण, संक्रमित सं‌ख्या १०७२८

सुर्खेत |

बुधबार नेपालमा थप ६ सय २९ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार कोरोना संक्रमितको कुल संख्या १० हजार ७ सय २८ पुगेको छ ।

२४ घण्टायता डिस्चार्ज हुनेको संख्या १ सय १४ रहेको छ । नेपालमा कोरोना भाइरस संक्रमण निको भएर घर फर्किनेको संख्या २ हजार ३ सय ३८ जना रहेका छन् ।

यसै गरि कर्णाली  प्रदेशमा पछिल्लो २४ घण्टामा २८ जना कोरोना भाइरस (कोभिड-१९)का संक्रमित थपिएका छन् । सुर्खेतस्थित प्रदेश अस्पताल, शुपन्छी रोग अन्वेषण केन्द्र र कर्णाली स्वास्थ्य विज्ञान प्रतिष्ठान जुम्लाको  प्रयोगशालामा भएको परीक्षणबाट बुधबार थप २८ जनामा कोरोना पुष्टि भएको हो ।

थपिएका संक्रमितमध्ये सुर्खेका १३, जुम्लाका चार, दैलेका तीन, जाजरकोट र कालीकोटका एक/एकजना रहेका छन् । यस्तै अन्य संक्रमितहरु दाङ, धनुषा, रुपन्देही, सप्तरी, ताप्लेजुङ र उदयपुरका एक/एक जना  रहेको सामाजिक विकास मन्त्रालयको स्वास्थ्य सेवा महाशाखा प्रमुख डा. लक्ष्मीनारायण तिवारीले जानकारी दिए ।

त्यस्तै जुम्लाको चन्दननाथ नगपालिकामा एक महिला र दुईजना पुरुष, सिँजा गाउँपालिकाका एकजना पुरुष, दैलखेको भैरवी, ठाँटीकाँध र नौमुले गाउँपालिकाका एक/एकजना पुरुष रहेका छन् । योसँगै कर्णालीमा कोरोना संक्रमितको संख्या १३३५ पुगेको छ ।

कर्णालीमा बुधबार थप ८ जना कोरोना संक्रमित डिस्चार्ज पनि भएका छन् । दैलेखको भगवतीमाई आसोलेसनबाट चारजना पुरुष, कर्णाली स्वास्थ्य विज्ञान प्रतिष्ठान जुम्लाको आसोलेसनबाट एकजना पुरुष, सुर्खेतको गुठु आसोलेसनबाट एकजना पुरुष र मुगुको कोटडाँडा आसोलेसनबाट एकजना पुरुष गरी ८ जना डिस्चार्ज भएका हुन् । योसँगै कर्णालीमा डिस्चार्ज हुनेको संख्या ५६८ पुगेको छ । हालसम्म पाँचजनाको मृत्यु भइसकेको छ ।