देउडा गीत

श्रीस्थान नाभिस्थान पानी ज्योति बल्दा
के रलाई नेपालका ककुना बर्षै चुनाव चल्दा
पञ्चायतकाल एक राजा थिए बहुदलमा धेरै
बहुमतको सरकार गरिबका मत त्यसै गया खेरै
राजै माथि राजा भया नेपाल सुहाउँदैन
भारत गइ तिरेका कर जनता खुवाउँदैन
दैलेखको पञ्चकोशी जुम्ला रारा ताल
काँक्रेविहार बुलबुले ताल प्रदेश धनकै थाल
अगाना लाएको बाली पछानैमा गोड्या
समयमा केही बन्या नाइँँ संस्कृतिलाई छोड्या
विदेशीले बुझेकै छन् नेपाल धनकै खानी
हात दिँदा देश जाला एक दिन नसुध्रिया बानी

काँ देइ आया घरको कमाई नेता हाड्न्या गाडि
विदेशै पालिन्या गरिब किन रिनकै भारी
तलब बढ्दो भत्ता बढ्दो सबकै मूल्य बढ्ने
कागज मिल्दा कुरा मिल्दा गरिबै हुन सड्न्या
कुरा रामका खेल्छन् दामका जनता मराउन्या
खायाका खान दिन्या पदै बढाउन्या
विश्वका आम जनता मर्दा औखती पाइएन
प्लाष्टिकमै जियान गयो सम्पत्ति चाहिएन
गरिबमुक्त हुने बजेट वडा प्रदेश आयो
बहाना सजिलै भयो कोरोनाले खायो
रोग भया औखती पाइँदो कलिको भावै हो
धन सम्पत्ति केही भनेना पाप त पापै हो
सरकारमा कुर्सीको लडाई रोगको जनता लडाई
नेता जस्तो पक्ष रोग नाइँ हुन्छ सबको मराई
आज दियो भोली लिन्या रिन भन्नु रिनै हो
धनको खानी नेपाल हाम्रो रिन लाउनु घिनै हो