१६ गायक–गायिकाले गाएको देशभक्ति गीत युट्युवमा

एउटै गीतमा १६ जना चल्तापुर्जा गायक–गायिकाको स्वर । राष्ट्रप्रेमले ओतप्रोत शब्दहरु । जनतामा राष्ट्रियता उर्लिएको समय । नरुचाइयोस किन ?

चार दिनअघि रिलिज गरिएको ‘मेरो देश नेपाल’ बोलको राष्ट्रिय गीतले युट्युवमा निकै राम्रो भ्यूज र प्रतिक्रिया पाइरहेको छ । अहिलेसम्म ६ लाखभन्दा धेरैपटक हेरिएको गीतमा ३ हजार ६ सयभन्दा बढि प्रतिक्रिया आएका छन् । सबैजसो प्रतिक्रिया सकारात्मक छन् ।

चर्चित टेलिभिजन प्रस्तोता भुषण दाहालको न्यारेसनपछि गीत सुरु हुन्छ । गीतको भिडियोलाई विधान कार्कीले निर्देशन गरेका छन् ।

गायिका अनिता चलाउने यस गीतकी प्रस्तुतकर्ता हुन् । गीतमा आएका प्रतिक्रियाहरुले आफूलाई निकै उत्साहीत बनाएको उनले बताइन् ।

‘यो गीत तयार गर्न मलाई धेरै वरिष्ठ गायक–गायिकाले सहयोग गर्नुभयो । मैले ल्याउन चाहेका केही गायक–गायिका विभिन्न कारणले छुट्नु पनि भएको छ । जे भए पनि गीतलाई दर्शकहरुले रुचाइदिनुभएकोमा सबैप्रति आभारी छु,’ उनले भनिन् ।

अनिताका अनुसार लकडाउनका बेला गायक–गायिकालाई उनीहरुको समय मिलाएर पालैपालो बोलाई भिडियो सुटिङ गरिएको थियो ।